Lögreglan í Hafnarfirði stöðvaði ökumann við Eyrartröð í Hafnarfirði rétt fyrir miðnætti. Fékk lögregla ábendingu um að karlmaður hefði ekið á ljósastaur og eftir það ekið á brott.
Var maðurinn grunaður um akstur undir áhrifum áfengis og fíkniefna. Þá var maðurinn ekki með ökuréttindi og verður líklega kærður fyrir eignaspjöll. Þá segir lögregla að maðurinn hafi hótað lögreglumönnum.
Klukkan hálf fimm í morgun hafði lögregla svo afskipti af tónelskum manni sem hafði lagt bíl sínum á bílastæði. Hafði maðurinn hljómtækin í botni en ekki kemur fram í skeyti lögreglu hvaða tónlist maðurinn var að hlusta á en hann hafi verið með smáræði af fíkniefnum á sér. Voru fíkniefnin tekin af manninum og málið afgreitt á vettvangi.