„Eina raunhæfa lausnin sem hægt er að finna á þessum vanda er auðvitað að takmarka bílaumferðina. Fækka bílum sem eru á ferli,“ segir fjölmiðlamaðurinn Egill Helgason á bloggsíðu sinni á vef Eyjunnar.

Bifreiðaeign aukist mikið

Þar gerir Egill svifryksvandann í Reykjavík að umtalsefni en undanfarna daga hefur svifryk mælst ítrekað yfir heilsuverndarmörkum. Eðli málsins samkvæmt hefur þetta vakið umræðu um umferðina í Reykjavík enda samhengi á milli umferðar og magns svifryks í lofti þegar veðuraðstæður eru eins og þær hafa verið síðustu daga.

Egill segir í færslu sinni að það sé makalaust hvað sé hægt að rífast mikið um bíla. „Fátt virðist fólk geta hugsað sér verra en einhvers konar takmarkanir á bílaeign og bílanotkun. Það að eiga bíl hefur ótrúleg áhrif á skynjun fólks á veruleikanum og sjónarmið þess,“ segir Egill og bendir á að bifreiðaeign hafi aukist mjög mikið á Íslandi á fáum árum.

„Við þetta hafa líka bæst tugir þúsunda bílaleigubíla. Hluti bílaflotans hefur líka stækkað, miklu fleiri en áður aka um á jeppum og jepplingum. Nú er svo komið að það eru fleiri bílar en íbúar í landinu,“ segir hann og bætir við að innviðir landsins hafi ekki verið hannaðir fyrir svo marga bíla.

„Vegirnir úti á landi þola ekki þetta álag. Eldri hverfi borgarinnar byggðust þegar bílarnir voru miklu færri, sum þegar bílaeignin var hundrað sinnum minni.“

Egill bendir svo réttilega á, eins og tölur síðustu daga um magn svifryks í lofti eru til vitnis um, að mengun vegna bifreiða sé orðin mikið vandamál í Reykjavík. Umferðin aukist jafnt og þétt og á tímum þegar gerðar eru meiri kröfur um umhverfisgæði en áður.

Takmarka umferð

„En samt heimtum við að komast greiðlega og hindrunarlaust áfram á bílunum okkar. Þótt þeim hafi snarfjölgað og umhverfið beri ekki þennan fjölda. Við skulum samt.“

Egill segir að eina raunhæfa lausnin sem hægt er að finna á þessum vanda sé að takmarka bílaumferðina. „Fækka bílum sem eru á ferli. En við skulum leita hátt og lágt að öðrum úrræðum. Og það er eins og atlaga að frelsi okkar og tilverurétti ef rætt er um að „þrengja að einkabílnum“– sem nota bene tekur alltaf meira og meira pláss.“