„Um síðustu helgi var farinn leiðangur í Loðmundarfjörð til að ná því sem eftir var af fé sem hefur verið í lausagöngu í firðinum, án eftirlits og fóðrunar. Tuttugu og níu kindur fundust og voru þær allar felldar.“
Þetta kemur fram í tilkynningu frá Matvælastofnun. Fimm manna hópur fór í Loðmundarfjörð laugardaginn 10. mars. Hann var skipaður dýraeftirlitsmanni Matvælastofnunar og fjórum aðstoðarmönnum. Þetta kemur fram í skeyti frá Matvælastofnun. Ástandið á skepnunum var misjafnt en flestar vor kindurnar horaðar þar sem beit er lítil á svæðinu. Þá voru sumar ærnar lembdar. Telur sérfræðingur hjá Matvælastofnun að kindurnar hafi gengið lausar í nokkurn tíma þar sem dýrin voru stygg.
Matvælastofnun hefur ítrekað haft afskipti af öðru búinu á undanförnum árum. Kröfur stofnunarinnar um úrbætur hafa ekki verið virtar að fullu og hefur fé frá bænum fundist í Loðmundarfirði að vetrarlagi. Var bóndanum gefinn frestur til 1. febrúar til að endurheimta fé sitt úr firðinum, sem hann gerði að hluta. Skyggni var ekki gott þegar hópurinn var í Loðmundarfirði og því ekki hægt að útiloka að fleiri skepnur séu nú í firðinum.