Garðar Viðarsson, betur þekktur sem Gæi á Snapchat, neitar alfarið að tjá sig um fjárdrátt, skilasvik og brot gegn bókhaldslögum sem maki hans, Anna Björk Erlingsdóttir, framdi sem framkvæmdastjóri einkahlutafélags sem ber gælunafn hans, Gæi ehf. Garðar var ekki ákærður vegna málsins.
Anna Björk var á dögunum dæmd fyrir að draga sér alls tæplega 60 milljónir króna úr fyrirtækinu. Gæi er einn vinsælasti snappari landsins, þar sem hann kallar sig Iceredneck, en yfir tíu þúsund manns fylgjast með honum dag hvern.
Brot Önnu Bjarkar hófust árið 2007 og stóðu til ársins 2014. Dómur hennar er langur og af færslum að dæma var hún tíður gestur á KFC og skemmtistaðnum Paddy´s.
Í ákæru kemur fram að Anna á þrjú börn og er þunguð af fjórða barni sínu. Segir í niðurstöðu dómsins að í ljósi hvað um mörg brot eru að ræða yfir langt tímabil sé ekki mögulegt að skilorðsbinda refsingu Önnur að öllu leyti. Anna Björk viðurkenndi sök fúslega fyrir dómi og var dæmd í 16 mánaða fangelsi en þar af voru 14 mánuðir skilorðsbundnir haldi hún skilorð.
Garðar er afskaplega vinsæll á snapchat og svokölluð snapchat-stjarna. Notendanafn hans er Iceredneck. Garðar útskýrði þá nafngift í samtali við Séð og heyrt.
„Það er klárlega redneck í mér en aðalástæðan fyrir því að ég set þetta nafn upp er að ég á fjölskyldu úti í Ameríku og þekki marga þar. Ég er með svolítið marga ættingja í Ameríku sem eru að fylgjast með mér á Snapchat og ákvað þetta nafn því ég er að sjálfsögðu Íslendingurinn og kallaður „Iceman“ í Ameríku og bjó því til þetta nafn.“
Það eina sem Gæi sagði þegar DV leitaði viðbragða vegna dómsins var: „No komment. Ókídókí bæjó.“