Fjöldi lögreglubíla við Strandgötu á Akureyri: Fimm handteknir

Minnst tveir einstaklingar voru handteknir í lögregluaðgerð í íbúðarhúsi á Akureyri fyrr í dag. RÚV greinir frá. Aðgerðin er sögð hafa verið umfangsmikil.

Fram kemur að lögreglumenn búnir skjöldum hafi brotist inn í húsið um 14 leytið í dag og fjöldi lögreglubíla hafi verið á vettvangi, bæði merktir og ómerktir.

Annar mannanna sem var handtekinn er sagður hafa komið margoft áður við sögu lögreglu.

Lögregla er enn á vettvangi en hefur engar frekari upplýsingar veitt um málið.

Uppfært kl.16.20.

Í tilkynningu frá lögreglu kemur fram að fimm einstaklingar hafi verið handteknir í aðgerðunum:

„Vegna gruns um alvarlega líkamsárás og frelsissviptingu í gærdag á karlmanni rúmlega þrítugum hafa 5 einstaklingar verið handteknir á Akureyri í dag. Í þessari aðgerð tóku þátt lögreglumenn á Akureyri, Húsavík, Dalvík og frá sérsveit Ríkislögregustjóra. Auk þessa voru framkvæmdar húsleitir á nokkrum stöðum og höfum við notið stuðnings tæknideildar lögreglunnar á höfuðborgarsvæðinu við þá vinnu.

Flestir hinna handteknu hafa komið áður við sögu hjá lögreglu ýmist vegna ofbeldismála eða fíkniefnamála. Hinir sömu hafa verið færðir til vistunar í fangageymslur lögreglu, en yfirheyrslur munu standa yfir fram á nótt og verður síðan framhaldið í fyrramálið. Í fyrramálið verður tekið ákvörðun um hvort krafist verður gæsluvarðhalds yfir einhverjum hinna handteknu, slíkt fer eftir framvindu rannsóknarinnar.

Rannsókn málsins er á frumstigi og vegna rannsóknarhagsmuna er ekki hægt að veita frekari upplýsingar að svo stöddu.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.