Heilsu Hinriks prins, eiginmanns Margrétar Þórhildar Danadrottningar, fer nú sífellt hrakandi. Þetta kemur fram í fréttatilkynningu frá dönsku krúnunni. Til merkis um hversu slæmt ástandið er hefur Friðrik krónprins stytt dvöl sína í Suður Kóreu þar sem hann var í erindagjörðum vegna Vetrarólympíuleikanna.
Nákvæmar upplýsingar um heilsufar Hinriks liggja ekki fyrir en danskir fjölmiðlar áætla að ástandið sé mjög slæmt. Mette Hybel, menningarrýnir hjá dagblaðinu DB, segir: „Þetta er í fyrsta sinn sem krúnan svo alvarlega yfirlýsingu um heilsufar Hinriks.“
Hinrik, sem er 83 ára gamall, hefur dvalið á Rigshospitalet sjúkrahúsinu síðan í lok janúar og gengist undir ýmsar rannsóknir. 2. febrúar gaf krúnan út fréttatilkynningu um að fundist hafi æxli í vinstra lunga en síðan hefur komið í ljós að það æxli var góðkynja. Þá hefur prinsinn gengist undir meðferð vegna lungnasýkinga og lungnabólgu. Talið er að hann hafi veikst á ferðalagi í Egyptalandi í janúar og farið á spítala strax eftir komuna heim til Danmerkur.
Prinsinn var mikið í fjölmiðlum sumarið 2017 vegna yfirlýsinga hans um að hann vildi ekki vera jarðaður við hlið Margrétar og hann væri afskiptur í konungshöllinni. Í ágúst var hann lagður inn á sjúkrahús vegna sársauka í fótlegg og í september gaf krúnan út yfirlýsingu um að hann væri hrjáður af elliglöpum.
