Karlmaður sem áður hefur hlotið dóm fyrir að brjóta kynferðislega á stjúpdætrum sínum starfar enn í dag sem ökukennari. Hann var aldrei sviptur réttindum sínum og hefur starfað sem ökukennari í tugi ára. Þetta kemur fram í Fréttablaðinu í dag.
Fram kemur að ökukennarinn sem um ræðir hafi hlotið dóm fyrir brotin í Hæstarétti um miðjan tíunda áratuginn. Voru brotin stórfelld og stóðu yfir í á fimmta ár, frá árinu 1982 til ársins 1987.
Fram kemur að ef að um stórfelld brot er að ræða sé leyfilegt að svipta ökukennara réttindum en það hafi ekki verið gert í þessu tilviki. Sæki einstaklingur um réttindi til að starfa sem ökukennari er ekki krafist þess að viðkomandi sýni fram á hreint sakavottorð.
„Við viljum hafa allt okkar á hreinu. Sýslumenn veita heimildina eftir ákveðnum reglum og Samgöngustofa hefur ákveðið eftirlit. Við erum fagfélag og það er ekki skylda að allir ökukennarar séu í okkar félagi. Ökukennarar vinna í einrúmi með einstaklingum og því skiptir miklu máli að reglurnar og eftirlitið sé skýrt,“ segir Björgvin Þór Guðnason, formaður Félags ökukennara á Íslandi í samtali við Fréttablaðið.