Það er eflaust mikil gleði sem fylgir því að vinna stóra vinninginn í lottó en það getur líka haft ákveðnar aukaverkanir í för með sér. Bandarísk kona er í erfiðri stöðu núna eftir að hún vann stóra vinninginn í lottó nýlega, engan smá vinning því hún vann 560 milljónir dollara en það svarar til um 56 milljarða íslenskra króna. Konan vill ekki láta opinbera nafn sitt í tengslum við vinninginn en sá galli er á gjöf Njarðar að samkvæmt reglum lottósins þarf að opinbera nöfn þeirra sem vinna svona stóra vinninga.

NewHampshire.com skýrir frá þessu. Þar segir að konan búi í Merrimack í New Hampshire og hafi unnið stóra vinninginn í janúar. En einhversstaðar segir að hamingja fylgi ekki alltaf peningum og það á kannski við í þessu máli. Konan vill ekki láta opinbera nafn sitt og heimilisfang en án þess fær hún vinninginn ekki greiddan út.

„Hún hefur búið í New Hampshire um árabil og er tekur virkan þátt í lífinu í nærsamfélaginu. Hún vill gjarnan halda því áfram og geta farið út í búð eða tekið þátt í opinberum atburðum án þess að þekkjast sem konan sem vann hálfan milljarð dollara.“

Sagði lögmaður hennar, Steven Gordon, í samtali við blaðið.

Konan hefur nú stefnt lottófyrirtækinu fyrir dóm og krefst þess að fá vinninginn greiddan út en njóta um leið nafnleyndar. Charlie McIntyre, forstjóri lottófyrirtækisins, segist skilja að konan vilji njóta nafnleyndar en vill þó halda sig við gildandi reglur.

Þessar reglur eru tilkomnar til að koma í veg fyrir að svindlað sé í lottóinu og að hluta til að auglýsa það. Það er þó mögulegt að láta einhver annan skrifa sig fyrir vinningnum eða með því að láta félag eða sjóð vera eiganda miðans, þá nýtur hinn rétti eigandi nafnleyndar. En konan hafði skrifað nafn sitt á miðann og því er ekki hægt að breyta. Í málsskjölum kemur fram að hún segi undirskriftina vera „stór mistök“.

Konuna dreymir um að búa áfram í New Hampshire og halda áfram að lifa lífi sínu eins og hún hefur gert fram að þessu. Draumur hennar er að stofna góðgerðarsjóð sem geti látið gott af sér leiða í heiminum. Lögmaður hennar segir að hún vilji þó sjálf halda sig alveg til hlés og aðeins fylgjast með starfi sjóðsins úr fjarlægð.

Það þarf kannski ekki að koma á óvart að konan vilji njóta nafnleyndar því í Bandaríkjunum eru mörg dæmi um að fólki, sem hefur unnið stóra lottóvinninga, hafi verið hótað, reynt að kúga fé út úr því og það jafnvel myrt.