Á undanförnum vikum hafa yfirmenn þriggja stærstu leyniþjónustustofnana Rússlands verið í Washington í Bandaríkjunum. Að minnsta kosti tveir þeirra funduðu með yfirmönnum bandarísku leyniþjónustunnar CIA. Þetta þykir mörgum undarlegt en yfirmaður CIA segir ekkert óeðlilegt við þetta.
Heimsóknirnar áttu sér stað skömmu áður en Donald Trump, Bandaríkjaforseti, frestaði gildistöku nýrra refsiaðgerða gegn Rússlandi. Refsiaðgerðirnar höfðu verið samþykktar með yfirgnæfandi meirihluta í báðum deildum Bandaríkjaþings en þær eru tilkomnar vegna meintrar íhlutunar Rússa í forsetakosningarnar 2016.
Mike Pompeo, yfirmaður CIA, segir í bréfi til Chuck Schumer, leiðtoga demókrata á Bandaríkjaþingi, að fundirnir með rússnesku leyniþjónustumönnunum hafi snúist um að samhæfa aðgerðir gegn hryðjuverkum og að fundir sem þessir hafi verið haldnir í tíð fyrri ríkisstjórna. Í bréfinu segir Pompeo að á fundum sem þessum sé rætt um efni sem eru erfið viðureignar og hagsmunir ríkjanna ekki þeir sömu.
Pompeo svaraði að sögn ekki hvort refsiaðgerðirnar gegn Rússlandi hafi verið ræddar.
Fyrir nokkrum dögum varaði Pompeo við því í sjónvarpsviðtali að Rússar muni reyna að blanda sér í þingkosningarnar í Bandaríkjunum í nóvember.