Situr í gæsluvarðhaldi útaf skáksmyglsmálinu – Úrskurðaður persónulega gjaldþrota
Grunur leikur á um stórfelld undanskot eigna og þjófnaði úr félaginu SS hús ehf. sem tekið var til gjaldþrotaskipta 10. janúar síðastliðinn. Þetta kemur fram í frétt Fréttablaðsins nú í morgun.
Undanfarið hefur Sigurður Kristinsson, sem átti félagið ásamt föður sínum og bróður, stýrt félaginu eða allt þar til hann stakk af til Malaga á Spáni á síðasta ári. Sigurður var sjálfur úrskurðaður persónulega gjaldþrota um miðjan janúar.
Í áðurnefndri frétt Fréttablaðsins kemur fram að undanskot eigna og óútskýrðar millifærslur af reikningum félagsins hlaupa á hundruðum milljóna. Þá er félagið einnig til rannsóknar hjá skattayfirvöldum meðal annars vegna mikilla vanskila á vörslusköttum. Málið er þó ekki enn komið til rannsóknar hjá héraðssaksóknara.
Sigurður situr nú í gæsluvarðhaldi grunaður um aðild að fíkniefnasmygli frá Spáni í máli sem kom upp á yfirborðið þegar sérsveit lögreglunnar braust inn í Skáksamband Ísland í byrjun árs. Enginn starfsmaður Skáksambandsins er grunaður um aðild að málinu en þangað hafði borist pakki í pósti sem reyndist innihalda um 8 kílógrömm af fíkniefnum.
Um svipað leyti bárust fréttir af því að eiginkona SIgurðar, Sunna Elvira Þorkelsdóttir, hefði fallið milli hæða á heimili þeirra í Malaga og lægi lömuð á sjúkrahúsi þar í borg. Var Sigurður handtekinn en sleppt að loknum yfirheyrslum. Síðar kom í ljós að hann er talinn tengjast fíkniefnasmyglinu. Yfirgaf hann Spán í kjölfarið og situr nú í gæsluvarðhaldi vegna smyglmálsins.