Rússneska raunveruleikaþáttastjarnan Oksana Aplekaeva fannst látin 2008. Lík hennar lá í skurði við hraðbraut í Rússlandi. Málið hefur ekki enn verið leyst og enginn hefur verið handtekinn vegna þess. Nýlega fékk lögreglan nýjar upplýsingar í málinu og ákvað í framhaldi að grafa lík Aplakaeva upp til að hægt væri að framkvæma nýjar réttarmeinafræðilegar rannsóknir. Við þær komu nýjar og óhugnanlegar upplýsingar fram.
Rannsóknirnar vörpuðu ekki nýju ljósi á hver morðingi Aplekaeva er en leiddu hinsvegar í ljós að lík hennar hafði verið misnotað kynferðislega af starfsmanni líkhússins. The Sun og fleiri fjölmiðlar skýra frá þessu.
DNA úr manninum, sem er 37 ára, fannst á líki Aplekaeva. Maðurinn hefur ekki neitað að hafa misnotað líkið kynferðislega en ekki er hægt að dæma hann fyrir það þar sem rússnesk lög ná að sögn ekki yfir óhugnað sem þennan.
The Sun segir að maðurinn hafi sagt að hann geti ekki þrætt gegn vísindalegum gögnum.
Það þarf ekki að koma á óvart að hann var rekinn úr starfi og auk þess yfirgaf eiginkona hans hann og fer leynt þannig að hann getur ekki haft samband við hana.
Ekki er talið að maðurinn hafi gerst sekur um viðlíka hátterni áður en hann hafði starfað í líkhúsinu í 12 ár. Lögreglan leggur áherslu á að maðurinn sé ekki grunaður um tengjast morðinu á Aplekaeva.