Khaled Cairo, 39 ára gamall hælisleitandi frá Jemen, er ákærður fyrir að hafa orðið Sanitu Braun að bana að heimili hennar við Hagamel í september 2017. Sanita var frá Lettlandi en var búsett hér á landi og hafði atvinnu hér.
Málið var þingfest í Héraðsdómi Reykjavíkur í gær. Þar játaði Khaled að hafa ráðist á Sanitu en neitar að hafa orðið henni að bana. Í frétt á Visir.is kemur fram að Khaled hafi tryllst vegna þess að Sanita átti í einhverjum samskiptum við aðra karlmenn.
Skýtur þetta nokkuð skökku við enda kom fram í umfjöllun DV um málið í fyrrahaust að Khaled og Sanita áttu aldrei í ástarsambandi og vildi hún ekkert með hann hafa. Í viðtali við DV sagði tengdasonur Sanitu að henni hafi staðið stuggur af Jemenanum og hafi tjáð fjölskyldu sinni og vinum að hún væri hrædd við hann.
Khaled veitti Sanitu áverka með glerflöskum, straujárni og slökkvitæki. Var mikið blóð á vettvangi en hún lést af sárum sínum.
Andzela Zumente, kunningjakona Sanitu frá Lettlandi, einnig búsett í Reykjavík, sagði einnig í samtali við DV í haust að Sanita hafi sagt að henni litist ekkert á Khaled og að hann væri ekki maður við hennar hæfi.