Hópur fólks sem eru meðlimir í Facebook-hópnum Vinir Jemens skoruðu í dag á Katrínu Jakobsdóttur forsætisráðherra sem og ríkisstjórn Íslands að beita sér á alþjóðavettvangi fyrir vopnahléi og friðarsamningum í Jemen. Í yfirlýsingu frá hópnum segir að þau vilja sjá íslensk stjórnvöld sína frumkvæði í norrænu samstarfi sem og innan sameinuðu þjóðanna og í öðrum alþjóðasamtökum auk viðræðna við stjórnvöld þeirra ríkja sem mestu skipta í þessu efni og Íslendingar hafa átt samleið með.
Í yfirlýsingu frá hópnum segir orðrétt:
„Við tengjumst Jemen á ýmsan hátt, meðal annars vegna atbeina Jóhönnu Kristjónsdóttur heitinnar. Við höfum undanfarin ár horft með óhugnaði á harmleikinn í þessu landi fjalla, sanda og stranda – sem til forna var kallað Arabía hin hamingjuríka.“
Segja þau að Ísland hafi áður sýnt fram á það að ekki þurfi fjölmenni, mikla fjármuni eða her til að ná miklum árangri eða láta rödd sína hljóma um heiminn til aðstoðar smáum ríkjum í vanda. Í tilkynningunni segir enn fremur:
„Við skorum á Katrínu Jakobsdóttur og ríkisstjórnina að gera allt sitt til að binda enda á þjáningar jemensku þjóðarinnar í hinu „gleymda“ stríði og hefja uppbyggingu í Jemen.“