Fimmtán ára stúlka í Wisconsin í Bandaríkjunum, Morgan Geyser, hefur verið dæmd til 40 ára vistar á geðsjúkrahúsi vegna óhugnanlegrar hnífstungu árið 2014. Vinkona hennar, Anissa Weier, var í desember dæmd til 25 ára vistar.

Málið vakti mikla athygli þegar það kom upp en árásina, sem beindist gegn bekkjarsystur þeirra, frömdu þær til heiðurs skáldsagna- og hryllingspersónunni Slender Man. Um var að ræða persónu sem sköpuð hafði verið á vefsíðunni Creepypasta sem nýtur nokkurra vinsælda meðal aðdáenda hryllingssagna.

Fórnarlamb árásarinnar hlaut nítján stungusár og mátti litlu muna að verr færi. Þegar stúlkurnar voru á bak og burt tókst henni að skríða burt, illa slasaðri, og láta vita af sér. Lokkuðu stúlkurnar fórnarlambið í skóglendi þar sem árásin var framin. Þær voru tólf ára á þessum tíma.

Geyser var sú sem stakk stúlkuna en Weier hvatti hana áfram.

Dómari í málinu dæmdi Geyser til hámarksrefsingar sem var í samræmi við kröfur ákæruvaldsins. „Við megum ekki gleyma því að þetta var tilraun til manndráps,“ sagði dómarinn, Michael Bohren. Taldi hann að samfélaginu stafaði hætta af henni fengi hún að ganga laus.