„Við erum hreinlega í vandræðum með vegfarendur sem virða ekki lokanir,“ segir G. Pétur Matthíasson, upplýsingafulltrúi Vegagerðarinnar, í samtali við RÚV.is.

Þar segir að Vegagerðin hafi óskað eftir aðstoð lögreglu í morgun vegna þess að vegfarendur virtu lokanir að vettugi í nágrenni höfuðborgarsvæðisins. Þetta átti til dæmis við um Hellisheiði sem lokað var í gærkvöldi vegna slæms veðurs. Ökumenn óku framhjá lokunarpóstum en vegna ófærðar festi fólk bíla sína.

G. Pétur segir að allt þetta geri það að verkum að lengri tíma tekur að opna veginn en ella. Hellisheiðin var enn lokuð á tíunda tímanum í morgun en vonir standa til að hægt verði að opna veginn fljótlega.

G. Pétur segir að lögregla hafi verið kölluð til í morgun. „Við vonumst til þess að vegfarendur taki meira mark á lögregluninni en björgunarsveitunum, það er eiginlega óskiljanlegt að fólk virði ekki þessar lokanir,“ segir G. Pétur við RÚV.