„Það var ekkert auðvelt að hringja í fjölskylduna og segja: „Heyrðu, I´m a jailbird“, ég er komin í djeilið. Ég bjóst við að heyra: „varstu ekki laus við þetta rugl?,“ segir Dagný Ósk Arnardóttir, þriggja barna móðir sem afplánar um þessar mundir fangelsisdóm fyrir fjölmörg auðgunarbrot. Hún á sorglega sögu að baki og segir að líklega hafa bjargað lífi sínu að vera kippt út úr samfélaginu og læst inni í fangelsi.
Þetta kemur fram í þættinum Paradísarheimt sem sýndur verður á RÚV næstkomandi sunnudagskvöld. Dagný á erfiða æsku að baki og hefur áður hlotið fangelsisdóm.
Hún var í langvarandi fíkniefnaneyslu, meðal annars sprautuneyslu og segir skömm hafa fylgt því að tilkynna fjölskyldunni að hún væri komin bak við lás og slá.
„En það voru allir á sama máli og ég er að segja núna. Sem betur fer var mér kippt inn af því að það voru bara allir að bíða eftir þessu símtali.
Bróðir minn hugsaði á hverjum degi þegar síminn hringdi og það var óþekkt númer eða spítlaanúmer: „Jæja er systir mín dáin? Er hún farin? Erum við búin að missa hana?“
Hún kveðst ekki hafa gert sér grein fyrir því að hún var hársbreidd frá dauðanum, ekki fyrr en hún var komin í fangelsi.
„Þetta er svo mikil sjálfselska í mér, að hafa leyft mér að fara svona langt, þar sem maður á börn. Að maður skyldi ekki hafa opnað augun, fyrr en það var næstum því of seint.“