Forsala á leiksýningu Borgarleikhússins á Rocky Horror hófst á fimmtudaginn og hefur leikhúsið því auglýst sýninguna grimmt á Facebook. Athygli vekur að búið er að „fótósjoppa“ Atla Rafn Sigurðarson leikara af plakötum verksins. Atli Rafn átti að leika krypplinginn Riff Raff í sýningunni og var því nokkuð fyrirferðarmikill á plakatinu.
Atli Rafn var rekinn úr Borgarleikhúsinu í desember vegna ásakana um kynferðislega áreitni. Andstæðingar #metoo-umræðunnar hafa líkt hreyfingunni við hreinsanir Stalíns. Þótt slíkar líkingar séu að mati flestra ósmekklegar þá minnir þessi gjörningur leikhússins óneitanlega á Stalín, sem fjarlægði andstæðinga sína af myndum líkt og þeir hefðu aldrei verið til.