Egill Helgason fjölmiðlamaður segir frelsið til byssueignar í Bandaríkjum vera algjör fjarstæða í ljósi tíðra skotárása í skólum í Bandaríkjunum. Átta skotárásir hafa átt sér stað í skólum Vestanhafs þó aðeins séu liðnir 45 dagar af árinu en í gær létust 17 í skotárás í menntaskóla í Flórída.

Sjá einnig: Minnst 17 látnir í áttundu skólaskotárásinni á árinu

Egill segir í pistli á Eyjunni að ef þetta væru ekki skotárásir í skólum heldur hryðjuverk þá væri allt vitlaust: „Stjórnkerfið væri gjörsamlega komið á hvolf. Líklega væri búið að skerða borgaraleg réttindi talsvert. Kannski væri byrjað stríð á erlendri grund. En viðbrögð bandarískra stjórnmálamanna við fjöldamorðum í skólum eru helst þau að fólk eigi að fara með bænirnar sínar.“

Hann segir frelsið til byssueignar sem er stjórnarskrárvarið í Bandaríkjunum sé algjör fjarstæða: „Þegar stjórnarskráin var samin voru byssurnar framhlaðningar. Nú er um að ræða vopn sem geta drepið tugi manna á örskotsstundu. Og það hlýtur að vera ömurlegt fyrir foreldra að geta ekki verið vissir um öryggi barna í skólum andspænis slíku brjálæði.“