Brynjar Níelsson þingmaður Sjálfstæðisflokksins segir að orðræða Sólveigar Önnu Jónsdóttur formannsframbjóðanda í Eflingu um að stöðugleiki gagnist bara auðvaldinu sé gamaldags verkalýðspólitík sem stóð í vegi raunverulegra kjarabóta og framfara áratugum saman.
Sólveig Anna sagði í viðtali við DV að það gangi ekki lengur að láglaunafólk sé látið axla ábyrgð á stöðugleika þegar það ríkir aldrei neinn stöðugleiki í þeirra lífi. „Stöðugleikinn er fyrir auðvaldið sem getur þá haldið áfram að auðgast. Það er enginn stöðugleiki hjá þeim sem eru alltaf með fjárhagsáhyggjur, þurfa að leita til ættingja og vina eftir láni út mánuðinn eða húsnæði,“ sagði Sólveig Anna.
Sjá einnig: „Stöðugleikinn er fyrir auðvaldið“
Brynjar segir í færslu á Fésbók að launþegahreyfingar séu afar mikilvægar í öllum frjálsum ríkjum. „Nauðsynlegt er að þar sé í forsvari ábyrgt fólk, sem skilur að forsenda bættra kjara sé öflugt og samkeppnishæft atvinnulíf. Nú um stundir er að gera sig gildandi í þessum hreyfingum fólk sem kannast ekkert við fordæmalausa kaupmáttaraukningu almennings og telur að stöðugleiki gagnist bara auðvaldinu. Er nú verið að dusta rykið af gamaldags verkalýðspólitík, sem stóð í vegi raunverulegra kjarabóta og framfara áratugum saman.“ segir Brynjar og vísar þar til Sólveigar Önnu.
Segir Brynjar það ylja „gömlum kaldastríðsmanni um hjartarætur“ að heyra að nýju þessi slagorð um „arðrán“ og „auðvaldið“. „Ég skil að sannfærðir sósíalistar hafi engan áhuga á stöðugleika því þá er auðvitað enginn jarðvegur fyrir byltinguna.“