Air Iceland Connect hefur frá og með miðjum maí næstkomandi ákveðið aðhætta flugi á tvo áfangastaði í Bretlandi, nánar tiltekið Belfast og Aberdeen. Þá hyggst félagið einnig leggja af flug til Kangarlussuaq í Grænlandi sem og flugi milli Keflavíkur og Akureyrar. „Eftirspurnin á þessum leiðum eftir verið minni heldur en væntingar stóðu til. Við höfum því ákveðið að leggja þær af og einbeita okkur að flugi frá Reykjavíkurflugvelli, sem er okkar kjarnastarfsemi,“ segir Árni Gunnarsson, framkvæmdastjóri Air Iceland Connect, í samtali við DV. Flugfélagið hefur flogið frá Keflavík til Narsarsuaq en mun í sumar fljúga þangað frá Reykjavík.

Air Iceland Connect, sem áður hét Flugfélag Íslands, hefur flogið fimm sinnum í viku frá Keflavík til Akureyrar. Aðeins er rúmt ár síðan að þjónustan hófst en viðtökur viðskiptavina hafa, eins og áður segir, valdið vonbrigðum.
Að sögn Árna hafa tekjurnar af flugleiðunum, sem senn leggjast af, numið um 7% af áætlaðri veltu flugfélagsins. „Við munum hagræða og leggja enn meiri áherslu á uppbyggingu á öðrum áfangastöðum hér heima og til Grænlands,“ segir Árni.

Sú mýta hefur verið á sveimi að erlendir ferðamenn hafi ekki verið að nýta sér innanlandsflugið sem skyldi. Að sögn Árna er það fjarri sanni. „Það hefur verið mikill vöxtur. Áður en ferðamannastraumurinn hófst fyrir alvöru voru erlendir ferðamenn um 5% af viðskiptavinum flugfélagsins. Núna eru þeir um 20% viðskiptavina á ársgrundvelli,“ segir Árni.