Suðurlandsvegur austan við gatnamót við Biskupstungnabraut er nú lokaður eftir árekstur tveggja bíla þar. Kemur þetta fram í tilkynningu frá lögreglunni á Suðurlandi.
„Unnið er að því að klippa út einn aðila úr hvorum bíl. Þeir eru báðir með meðvitund en ekki er vitað frekar um ástand þeirra. Suðurlandsvegur verður lokaður vegna vinnu á vettvangi í einhverja stund. Hjáleið um Eyrarbakkaveg og Þorlákshafnarveg og eins er unnt að komast upp Biskupstungnabraut og yfir hjá Laugarási,“ segir í tilkynningunni sem birt var upp úr klukkan fjögur í dag.
Uppfært: Búið að ná mönnunum úr bílunum
Lögreglan á Suðurlandi uppfærði tilkynningu sína kl. 16:40. Er nú búið að ná slösuðu mönnunum út úr bílunum:
„Búið er að ná fólki úr báðum bílunum og verða báðir fluttir til aðhlynningar á sjúkrahúsi í Reykjavík. Unnið er að rannsóknarvinnu á vettvangi og verður vegurinn lokaður enn um sinn.“
Uppfært: Suðurlandsvegur hefur verið opnaður að nýju.