Pistlahöfundurinn Hrafn Jónsson segir á Twitter að ein verstu mistök sem hann hefur gert hafi verið að gefa mormónum símanúmerið sitt. Hann rifjar upp níu ára stöðufærslu sína um þau kynni en þá vissi hann ekki hvaða afleiðingar þetta myndi hafa.
Fyrir sléttum níu árum skrifaði Hrafn á Facebook: „Lenti á góðu spjalli við mormónska trúboða, deildi ólíkum trúarskoðunum og skiptist á símanúmerum við þá. Óþarfi að vera alltaf í fýlu við þá sem vilja deila einhverju nýju með manni.“
Þetta reyndist hins vegar afleit hugmynd, líkt og Hrafn greinir frá á Twitter í dag. „Þetta voru hræðilegustu mistök sem ég hef gert. Var ógeðslega þunnur að labba á Vitabar, mjög meyr og opinn eins og maður er í slíku ástandi. Finn til samkenndar með þessum mönnum og ég ég læt þá fá númerið mitt. Þeir hringja svo í mig þrisvar í viku í tvö ár,“ skrifar Hrafn.
Ásgeir Jónsson, aðstoðarþjálfari Aftureldingar og fyrrverandi blaðamaður, skrifar athugasemd við færsluna og segir þetta aðdáunarvert að einhverju leyti. „Sem er svo aðdáunarvert á einhverju skrítnu leveli, að nenna því. Oft pælt í því hvort þeir séu einlægir í þessu eða séu bara „Looool, hringjum í Krumma“,“ segir Ásgeir.
Hrafn svarar þessu: „Þessir gæjar eru alveg peak nenna einhverju kjaftæði. Læra betri íslensku en íslenskir unglingar tala á svona ári, bara til að geta böggað mig stöðugt í 3 ár.“