Mygla kom upp í skrifstofuhúsnæði Alþingis við Kirkjustræti 10 nýverið og er talið óhjákvæmilegt að ráðast í viðgerðir. Viðgerðir hafa reynst umfangsmeiri en talið var og hefur því áætlaður heildarkostnaður tvöfaldast. Fjármálaskrifstofa Alþingis var meðal annars þar til húsa.
RÚV greinir frá þessu. Helgi Bernódusson, skrifstofustjóri Alþingis, segir í samtali við RÚV að nánast allt innvolsið í húsinu hafi verið ónýtt. Hann segir að fyrir um þremur árum hafi farið að bera á því að eitthvað væri misjafnt í húsinu. „Og þegar farið var að skoða þetta nánar reyndist allt innvolsið í húsinu vera ónýtt, það varð að skrapa allt húsið að innan,“ segir Helgi.
Húsið hefur því staðið autt í nærri þrjú ár vegna viðgerða en Helgi segir að mygla sé svo mikil að starfsmenn hafi fundið mikið fyrir henni. Helgi segir að heildarkostnaðurinn við framkvæmdina sé um 47 milljónir en upphaflega hafi verið gert ráð fyrir rúmum tuttugu milljónum.