Klukkan 23 í gærkvöldi var lögreglunni tilkynnt að bifreið hefði verið stolið í Kópavogi. Skömmu fyrir miðnætti var par handtekið nærri miðborg Reykjavíkur en það er grunað um að hafa stolið bifreiðinni. Parið var vistað í fangageymslu og bifreiðinni komið til eigandans.

Skömmu eftir miðnætti var ofurölvi ferðamaður handtekinn á hóteli í Reykjavík. Hann er grunaður um líkamsárás og eignaspjöll. Hann var vistaður í fangageymslu.

Á tíunda tímanum í gærkvöldi datt kona á blautu gólfi í Sundhöll Reykjavíkur og meiddist á hné og hönd. Hún var flutt á slysadeild með sjúkrabifreið.

Á áttunda tímanum í gærkvöldi var tilkynnt um innbrot í geymslu fjölbýlishúss í Grafarholti.

Tveir ökumenn voru handteknir í gærkvöldi grunaðir um ölvun við akstur. Annar þeirra reyndist vera sviptur ökuréttindum.

Tveir ökumenn voru handteknir í nótt grunaðir um akstur undir áhrifum fíkniefna. Annar þeirra er einnig grunaður um ölvun við akstur.