Margir íbúar við Elliðavatn í Kópavogi eru allt annað en sáttir við ástandið sem ríkir á svæðinu og segja sumir að þar ríki óöld. Á svæðinu eru tugir yfirgefinna sumarbústaða sem hafi orðið fyrir kerfisbundnum skemmdarverkum undanfarið.
Þetta kemur fram í Fréttablaðinu í dag. Þar segir að í bréfum sem tveir íbúar við Hólmaþing hafi sent bæjaryfirvöldum segi meðal annars:
„Það má segja að á svæðinu ríki óöld sem þarf að uppræta án tafar.“
Í bréfunum segir einnig að meðfram Elliðavatni séu tugir yfirgefinna sumarbústaða sem hafi fram að þessu verið nýttir til partýstands og sem leiksvæði barna.
„Nú á síðustu mánuðum virðist sem atferli hústökumanna hafi breyst til hins verra og skemmdir eru unnar á bústöðum á kerfisbundinn hátt. Gengið er á milli bústaða, eldur kveiktur, húsgögn og girðingar brotnar niður sem og rúður brotnar.“
Segir í bréfunum að sögn Fréttablaðsins.
Íbúar á svæðinu eru sagðir hafa óskað eftir aðstoð lögreglu í nokkur skipti en lögreglan hafi sinnt því seint og illa.
„Það má segja að á svæðinu ríki óöld sem þarf að uppræta án tafar. Svæðið er Kópavogi til skammar, slysahætta er gríðarleg og útivistarfólk óttast öryggi sitt á síðkvöldum.“
Segja bréfritararnir og fleiri taka undir sjónarmið þeirra og áhyggjur.
Fréttablaðið hefur eftir Sigríði Björg Tómasdóttur, almannatengli hjá Kópavogsbæ, að bærinn hafi reynt að fá landeiganda og leigutaka til að hreinsa svæðið. Nú verði boðað til samráðsfundar landeiganda, byggingarfulltrúa og heilbrigðiseftirlitsins þar sem mótaðar verði tillögu um úrbætur þar sem ljóst sé að úrbóta sé þörf á svæðinu.