Tónlistarmennirnir Emmsjé Gauti og Ingó Veðurguð hafa eldað grátt silfur saman um nokkra ára skeið. Illdeilur þeirra náðu sennilega hámarki árið 2009 þegar Gauti sagði að það ætti að banna tónlist Ingó.
Sá skaut til baka og sagðist ekki vita hver Gauti væri. „Ég veit ekkert hver Emmsjé Gauti er. Makk-Gauti, þetta hljómar svolítið eins og hamborgarastaður,“ sagði Ingó í viðtali við Fréttablaðið. Í sama viðtali sagði hann svo: „En ég myndi pottþétt mæta ef hann myndi opna hamborgarastað.“
Nú nærri tíu árum síðar er Gauti að opna hamborgarastað í Vesturbænum, Hagavagninn, og notar Gauti tækifærið til að slíðra sverðin. „Ingó í Veðurguðunum er hér með boðið að klippa á borðann og taka fyrsta bitann þegar við opnum Hagavagninn næsta föstudag,“ segir Gauti á Twitter.
Ingó í Veðurguðunum er hér með boðið að klippa á borðann og taka fyrsta bitann þegar við opnum Hagavagninn næsta föstudag. pic.twitter.com/so73ZylFUn
— Emmsjé (@emmsjegauti) November 5, 2018