Í það minnsta tvö myndbönd eru nú í dreifingu á samfélagsmiðlinum Snapchat sem sýna hnífaárásina sem átti sér stað á Akureyri á laugardaginn. Nútíminn greindi fyrst frá tilvist myndbandanna. Í gæsluvarðhaldsúrskurði yfir meintum árásarmanni kemur fram að hann sé grunaður um að hafa ráðist á á annan karlmann með hníf um hábjartan dag.

Í myndböndunum má heyra hlátur en líklegt er að viðkomandi hafi ekki áttað sig á alvarleika árásarinnar. Þolandi árásarinnar reyndist með tíu stungusár á hálsi, höfði og baki. Nútíminn greinir frá því að árásin hafi átt sér stað fyrir utan Arion-banka á Akureyri.

Í gæsluvarðhaldsúrskurði mannsins segir: „Við skoðun upptökunnar er svo að sjá sem varnaraðili hafi í krepptum hnefanum hnífsblað, sem kemur út á milli fingra hans. Slær hann með hnefanum til brotaþola í efri hluta líkama, háls og höfuð. Sést að brotaþoli verður blóðugur.“ Maðurinn var síðar handtekinn á heimili sínu en þar fann lögregla blóðugan hníf með um 4 sentímetra löngu blaði. Á honum er ekki venjulegt skefti, heldur eins konar handfang.

Líkt og fyrr segir var maðurinn stórslasaður en í úrskurði er vitnað í læknavottorð. „Segir þar að brotaþoli hafi haft fjölmarga skurði um andlit og bak. Þeirra markverðastir séu djúpur skurður neðan við vinstra kjálkabarð, sem nái í gegnum munnvatnskirtil og vöðva og liggi því í raun nálægt ,,external jugular“ bláæð. Einnig hafi verið markverður skurður um vinstra gagnauga, djúpur, og virðist hafa flísað úr höfuðkúpu þar undir. Annað höfuðkúpubrot hafi verið á hnakka vinstra megin,“ segir í úrskurði.