Sigmundur Davíð Gunnlaugsson, formaður Miðflokksins, vill að Āsiyaah Naurīn, eða Asia Bibi, fái hæli á Íslandi. Með því gæti Ísland tekið eindregna afstöðu í alþjóðlegu prinsippmáli.
Bibi var dæmd til dauða í Pakistan árið 2009, sökuð um guðlast. Asia er kristin kona og segir sagan að hún hafi tekið sopa af vatni sem hún sótti fyrir íslamskar konur sem unnu með henni við berjatínslu. Með því hafi hún vanvirt Múhameð spámann og Kóraninn. Saga Bibi er átakanleg, hún var 38 ára fimm barna móðir þegar atvikið átti sér stað. Hópur fólks ruddist inn á heimili hennar og var hún handtekin af lögreglu fyrir guðlast, eftir 1 og hálfs árs fangelsisvist var hún dæmd til dauða og dvaldi í einangrun í 9 ár áður en hún var sýknuð í hæstarétti Pakistans. Mótmæli brutust út í landinu vegna þess og hefur lögmaður hennar flúið land og leitar að hæli fyrir hana.
Sigmundur Davíð segir í grein í Morgunblaðinu í dag að Ísland ætti að bjóða henni að setjast að hér á landi. „En vandi Bibi er að hún er kristin og það skorar ekki hátt hjá stórum hlutum þess hóps sem stundum er kallaður „góða fólkið“ og gefur oft tóninn í opinberri umræðu.“
Segir Sigmundur að beiðni um hæli á Bretlandi hafi verið hafnað þar sem hæli fyrir Bibi geti falið í sér öryggisógn og styggt ákveðna hópa í landinu. „Þar er að sjálfsögðu átt við hópa frá sömu slóðum og með sömu viðhorf og þeir sem ofsóttu Bibi í heimalandinu. Ef fréttirnar eru réttar virðist stjórnvöldum í Bretlandi frekar vera umhugað um að styggja ekki öfgahópana en að vernda Bibi og fjölskyldu hennar. Í breskum fjölmiðlum hafa þarlendir bent á hvers konar vanda landið sé komið í ef það treystir sér ekki til að taka á móti 47 ára landbúnaðarverkakonu sem hefur verið sýknuð í heimalandinu eftir fráleitar sakargiftir, óréttmætan dauðadóm og einangrunarvist í áratug. En á undanförnum árum hafi stjórnvöld í Bretlandi ekki talið sig komast hjá því að veita alræmdum öfgamönnum og dæmdum haturspredikurum, með tengsl við hryðjuverk, landvist af „mannúðarástæðum“.“
Kanada hefur boðið henni hæli. Það er til skoðunar í fleiri löndum, þar á meðal Ítalíu, Spáni og Hollandi, hvað sem því líður hvetur Sigmundur ríkisstjórn Íslands að gefa það út að Ísland sé tilbúið að taka á móti henni og fjölskyldu hennar.
„Þótt Ísland teljist friðsælasta land heims eru ef til vill ekki mjög miklar líkur á að landið verði fyrir valinu sem griðastaður Asiu Bibi, eiginmanns hennar og barnanna fimm. En það að bjóða formlega upp á slíkt myndi sýna eindregna afstöðu Íslands í þessu stóra alþjóðlega prinsippmáli og vonandi verða hvatning fyrir önnur lönd að verða jafnafdráttarlaus í afstöðu sinni. Með því gæti rödd litla Íslands gert mikið gagn.“