Aðstandendur Kristins Rúnarssonar og Þorsteins Guðjónssonar, sem fórust í október 1988 við fjallgöngu á fjallinu Pumori í Nepal, hafa þegið boð Leifs Arnar Svavarssonar, hjá Íslenskum fjallaleiðsögumönnum, um að Leifur fari að þeim stað sem talið er að jarðneskar leifar þeirra séu nú staðsettar, í um 5.500 metra hæð.

Sjá einnig: Lík Kristins og Þorsteins sem fórust í Nepal fyrir 30 árum fundin

Fram kemur í fréttatilkynningu að staðurinn sé talinn nægilega aðgengilegur þannig að Leifi og öðrum er ekki talin hætta búin, enda er aðstendendum öryggi þeirra hugleikið. Hefur Leifur þegar lagt af stað og mun kanna möguleika á því að flytja jarðneskar leifar þeirra til Katmandú, höfuðborgar Nepal. Ráðgert er að þar muni fulltrúar aðstandenda taka við og annast um nauðsynlegar ráðstafanir fyrir flutning þeirra heim til Íslands. Hafa borgaraþjónusta utanríkisráðuneytisins og alþjóðadeild og kennslanefnd ríkislögreglustjóra aðstoðað við skipulagningu.

Sjá einnig: Jón vill að jarðneskum leifum Kristins og Þorsteins verði komið heim

Vegna fyrirspurna um hvernig megi aðstoða hefur verið stofnaður styrktarreikningur í Arion banka á nafni Kristins Steinars Kristinssonar, kt. 310389-2939, nr. 0370-13-004559.

Nokkur tími mun líða þar til ljóst er hvort takmarki ferðarinnar verði náð og segir að nánari upplýsingar verði einvörðungu veittar við ferðalok. Aðstandendur vilja koma að þökkum fyrir allan þann hlýhug sem þeir hafa svo sannarlega fundið fyrir.