Barði Jóhannsson tónlistarmaður, oftast kenndur við Bang Gang er nú orðinn safngripur á Rokksafni Íslands. Stytta af Barða var afhjúpuð á safninu síðastliðinn föstudag, og var það Barði sjálfur sem sá um það.
Þetta kemur fram á vef Víkurfrétta. Styttan var framleidd á Ítalíu og var áður til sýnis á Triennale hönnunarsafninu í Mílanó. Líkt og sjá má heldur Barði á stórum matargerðarhníf og í fylgd með honum er lítill hundur með andlit Barða og vígtennur.
Í samtali við mbl.is segir Barði að hugmyndin að styttunni sé sprottin út frá hryllingsmyndum og vampírum. „Og náttúrulega matargerð, það er klárt mál að þarna er stór matargerðarhnífur og þarna er eflaust verið að fara að matreiða sushi fyrir hundinn.“