Guðrún Ósk Steinbjörnsdóttir hefur búið á Vatnsnesi í tæplega 2 ár og segir að þó þar sé gott að búa þá sé Vatnsnesvegur orðinn íbúum mikill kvíðavaldur. Kletturinn Hvítserkur er vinsæll meðal ferðamanna og hefur umferð um Vatnsnes aukist mikið og viðhaldi á veginum er svo ábótavant að Guðrún segir veginn í dag ónýtan. Flestir ábúendur á Vatnsnesi hafi horft upp á eða komið að slysi, mörg þar sem fólk hefur slasast og íbúar óttist að í framtíðinni slasist einhver lífshættulega, láti jafnvel lífið, ef ekkert er að gert.
„Það sjá allir að ástandið getur ekki verið svona mikið lengur. Það mun enda með stórslysi og við erum einfaldlega ekki tilbúinn til þess að bíða eftir að það gerist.“
Samkvæmt Guðrúnu hefur komið til margra útkalla vegna bíla í hremmingum, sem fara útaf, festa sig eða velta. Björgunarsveitir og sjúkrabílar eru þar algeng sjón sem og kranabílar sem draga bifreiðar sem hafa orðið fastar eða skemmst.
Árið 2004 varð banaslys við Valdalæk þegar tékknesk kona á fertugsaldri lést þegar bifreið sem hún var farþegi í valt á veginum og í október 2016 valt bifreið við Krossnes með fjórum ferðamönnum sem alla þurfti að flytja til Reykjavíkur í forgangsakstri, en mikil mildi þótti að þeir hafi lifað slysið af. Guðrún hefur það eftir sjúkraflutningamanni að hræðilegt hefði verið að flytja fólk á veginum eins og hann var 2016 og hefur Guðrún miklar áhyggjur af því viðbragðsaðilar séu lengur að komast á slysstað heldur en ef aðstæður væri í betri.
„Þegar alvarleg slys verða þá skiptir oft hver sekúnda máli, hvað þá mínútur“.
Börnin á Vatnsnesi fara með skólabíl í skólann. Þau börn sem lengst sitja eyða 120 mínútum á dag í skólabílnum sem nemur 10 klukkustundum en samkvæmt 3. mgr. 4. gr. reglna um skólaakstur í grunnskóla skal miðað við að daglegur heildartími skólaaksturs, að biðtíma meðtöldum, sé ekki lengur en 120 mínútur á viku. Ná þau börn sem lengst sitja í skólabílnum á Vatnsnesi þessu hámarki og fara yfir það ef aðstæður versna. Guðrún segir að börnunum kvíði fyrir því að fara í og úr skóla, þau verði bílveik og séu svo þreytt þegar heim er komið að þau geti lítið tekið þátt í fjölskyldulífinu. Nú fari fljótlega að frysta og frjósi þá vegurinn með öllum sínum holum og telur hún að þá muni ferðatími barnanna lengjast ennþá frekar sem og vegfarendum verði voðinn vís.
Í gær var haldinn almennur fundur með Sigurði Inga Jóhannsyni, samgöngu- og sveitarstjórnarráðherra, þar sem Vatnsnesvegur var tekinn til umfjöllunar og fannst Guðrúnu ráðherra sýna málinu skilning. Hún sagði í samtali við DV að henni hefði fundist ráðherra mjög jákvæður og hefði hann gert íbúa mjög vongóða um að vegurinn komist inn á samgönguáætlun og verði malbikaður.
