Grínistinn og fyrrverandi borgarstjórinn Jón Gnarr hefur ákveðið að farga Banksy-verkinu sem hann fékk þegar hann gegndi embætti borgarstjóra. Þetta staðfestir hann á Facebook-síðu sinni og tekur fram að hann hafi ákveðið í samráði við eiginkonu sína, Jógu Jóhannsdóttur, að losa sig við myndina við fyrsta tækifæri.
Umrætt verk hefur verið í brennidepli á síðustu dögum eftir að sást til myndarinnar á Twitter-síðu Jóns. Borgarstjórinn fyrrverandi hafði áður upplýst í viðtali við veftímaritið The Rumpus að hann hefði óskað eftir verki frá götulistamanninum sjálfum og fengið jákvætt svar. Jón segir við veftímaritið árið 2012 að þurft hafi að útbúa nýtt verk sem væri ólíkt frummyndinni. „Ef þú berð saman þetta verk við hið upprunalega sérðu að það eru öðruvísi blóm á mínu. Fáir gera sér grein fyrir því hversu sjaldgæft þetta er,“ segir Jón.
Sjá einnig: Mána heitt í hamsi: Efast um útskýringar Jóns Gnarr – „Hvers konar djöfulsins meðvirknissamfélag er þetta?“
Samkvæmt siðareglum kjörinna fulltrúa Reykjavíkurborgar gilda strangar reglur um gjafir sem kjörnir embættismenn mega þiggja, en Jón þvertók fyrir það á dögunum að um verðmætt og ósvikið verk væri að ræða, heldur plakat.
Jón segir að samskiptin við Banksy hafi farið fram í gegnum þriðja aðila. Eftir langan tíma fékk hann síðan myndina senda í gegnum tölvupóst með þeim skilaboðum að hann mætti prenta hana út og hengja upp.
„Mér fannst þetta mikil upphefð. Ég var bara sá einfeldningur að halda að þetta væri eitthvað merkilegt og þess vegna fullyrti ég það í þessu viðtali sem við mig var tekið,“ skrifar Jón á Facebook í dag, en hann segir ákvörðunina um að farga verkinu vera til þess að myndin og umræðan í kringum hana trufli engan.
„Seinna þegar mér varð ljós einfeldni mín reyndi ég bara að hafa gaman af þessu og fannst þetta bara krúttlegt. Þegar ég svo hætti störfum tók ég myndina með mér til minningar um þennan tíma og hef svo sem ekkert velt þessu neitt fyrir mér.“