Héraðsdómur Reykjaness hefur dæmt spænskan ríkisborgara í tóf mánaða óskilorðsbundið fangelsi fyrir fíkniefnainnflutning.
Maðurinn, Antonio Lopez Ojeda, var gómaður á Keflavíkurflugvelli þann 26. ágúst síðastliðinn. Við leit á honum fundust rúm 830 grömm af kókaíni sem hann hafði falið í skónum sínum. Antonio var að koma til Íslands frá Madrid á Spáni.
Fyrir dómi játaði hann brot sitt en sagðist þó ekki vera eigandi efnanna. Hann hafi tekið að sér að flytja þau til Íslands gegn þóknun.
„Eru ekki efni til að draga frásögn hans í efa og verður til þess litið við ákvörðun refsingar hans. Jafnframt ber að taka tillit til þess að ákærði var allt frá fyrstu tíð samvinnufús við rannsókn lögreglu og greindi hann skilmerkilega frá atvikum. Fyrir dómi játaði hann og skýlaust sök. Á hinn bóginn verður ekki framhjá því horft að ákærði stóð að innflutningi mikils magns fíkniefna,“ segir í dómi héraðsdóms.
Maðurinn var sem fyrr segir dæmdur í tólf mánaða fangelsi en til frádráttar kemur gæsluvarðhald frá 26. ágúst. Þá var honum gert að greiða tæplega eina milljón króna í sakarkostnað.