Síðdegis í gær var lögreglunni tilkynnt um innbrot og þjófnað úr bílskúr í hverfi 108. Ekki er ljóst hverju var stolið en skemmdir voru unnar á bifreið sem var í skúrnum. Einnig var tilkynnt um innbrot í bifreið í hverfi 105 en úr henni var stolið fatnaði og fleiru. Einnig var persónulegum munum stolið úr starfsmannaðstöðu verslunar í Kópavogi.
Þar með var þjófnaðarmálunum ekki lokið því loftpressu var stolið úr húsi í Árbæjarhverfi síðdegis í gær. Undir miðnætti var síðan tilkynnt um innbrot í hús í hverfi 108. Ekki er ljóst hverju var stolið en málið er í rannsókn. Á fimmta tímanum í nótt var tilkynnt um innbrot í leikskóla í Breiðholti, ekki liggur fyrir hverju var stolið.
Um klukkan 23 í gærkvöldi var maður handtekinn við veitingahús í hverfi 105. Hann var í annarlegu ástandi og er grunaður um líkamsárás, eignaspjöll og fleira. Maðurinn var vistaður í fangageymslu. Á fyrsta tímanum í nótt var ölvaður maður handtekinn í Breiðholti. Hann hafði valdið íbúum ónæði og fór ekki að fyrirmælum lögreglu. Hann var vistaður í fangageymslu.
Einn ökumaður var handtekinn í gærkvöldi grunaður um að vera undir áhrifum fíkniefna og að vera ekki með ökuskírteini meðferðis. Annar var handtekinn í nótt en sá er grunaður um ölvun við akstur og að hafa verið undir áhrifum fíkniefna.
