Isabella Rees, fjórtán mánaða stúlka, lést á sjúkrahúsi í Ástralíu árið 2015. Foreldrar Isabellu höfðu ítrekað farið með hana til læknis þar sem hún var augljóslega mjög kvalin.

Það var ekki fyrr en of seint að læknar áttuðu sig á hvað hafði gerst. Isabella hafði gleypt svokallaða hnapparafhlöðu sem brenndi sig í gegnum líffærin í kviðarholi hennar.

Frá þessu greinir ástralski fréttamiðillinn News.com.au en nú stendur yfir rannsókn dánardómstjóra á andláti litlu stúlkunnar.

Læknar vissu í raun ekkert hvað var að hrjá Isabellu og leiddu fjölmargar rannsóknir orsökina ekki í ljós. Móðir hennar, Allison Rees, segir að hún og eiginmaður hennar hafi spurt lækna hvort möguleiki væri á að hún hefði gleypt eitthvað. Sást stúlkan með hnapparafhlöðu daginn sem hún veiktist.

Læknar sögðu að það væri ekki mögulegt. Ef hún hefði gleypt eitthvað myndi það skila sér rétta leið.

Isabella var fárveik; hún var með háan hita og kastaði upp blóði. Þrátt fyrir öll þessi einkenni fengu foreldrar hennar þau skilaboð að stúlkan myndi ná sér. Var hún ekki látin gangast undir röntgenmyndatöku til að taka af allan vafa um að hún hefði gleypt eitthvað.

Sem fyrr segir lést Isabella á sjúkrahúsi árið 2015 og á rannsókn dánardómstjóra að leiða í ljós hvort heilbrigðisstarfsfólk hafi gert mistök við umönnun hennar.

Hnapparafhlöður eru stórhættulegar börnum og eru til nokkur dæmi þess að börn hafi gleypt þær með skelfilegum afleiðingum.