Gunnar Smári Egilsson, fjölmiðlamaður og einn stofnenda Sósíalistaflokksins, segir að Kristjana Valgeirsdóttir, fjármálastjóri Eflingar, sé einungis á höttunum eftir betri starfslokasamning. Um helgina fullyrti Morgunblaðið að ólga ríkti meðal sumra á skrifstofu Eflingar eftir að Sólveig Anna Jónsdóttir var kjörin formaður stéttarfélagsins. Kristjana ku hafa neitað að greiða reikning frá eiginkonu Gunnar Smára, Öldu Lóu Leifsdóttur, fyrir verkefnið Fólkið í Eflingu.
Gunnar Smári segir að reynt sé að mála upp þá mynd að hann sé einhverskonar leiðtogi sértrúarsöfnuðar. „Æði held ég að þetta eigi eftir að verða leiðinlegt mál, að festast á milli deilu fjármálastjórans Eflingar og yfirmanna hennar. Lögfræðingur og ráðgjafar hennar telja augljóslega að hún fái betri starfslokasamning við Eflingu með því að teikna upp mynd af forystu Eflingar sem einhvers konar cult-söfnuði þar sem ég á að vera Raspútín á bak við tjöldin, en ekki upprisu grasrótarinnar gegn spilltri og aðgerðarlítilli forystu,“ segir Gunnar Smári.
Sjá einnig:
Gunnar Smári er fokillur út í Kristjönu – „Ég bið ekki að heilsa henni ef þið rekist á hana“
Hann segist ekkert hafa skipt sér af málefnum Eflingar. „Ef einhver hefur áhuga á raunveruleikanum þá skipti ég mér akkúrat ekkert af Eflingu, þar er fólk kosið og ráðið til að stýra félaginu. Ég hef ekki komið inn á skrifstofu Eflingar síðan ég hitti Sigurð Bessason þar fyrir mörgum árum, það er svo langt síðan að ég man ekki erindið. Það er lykilatriði í vaxandi hreyfingu að hver sinni sínu, það skapar glundroða og er ávísun á árangursleysi ef allir vilja hafa skoðun á öllu og ráða sem mestu,“ segir Gunnar Smári.
Hann bætir enn fremur við að ljóst sé að gagnbyltingaröfl reyni að berjast gegn nýrri stjórn. „Fólkið í Eflingu, meirihlutinn sem félagsmenn sendu þangað inn til að umbylta félaginu, er augljóslega upp fyrir haus í baráttu við gagnbyltingaröflin, sem vilja halda félaginu eins og það var orðið eftir áratuga eyðileggingu fámennrar klíku sem náð hafði völdum í félaginu. Ég óska forystu Eflingar góðs gengis í þeirri baráttu. Mín ráð til hennar er vera trú erindi sínu, kröfu 80% félagsmanna um endurreisn félagsins og róttæka stefnubreytingu,“ segir Gunnar Smári.
Hann segir að lokum að hann sé nú að einbeita sér að Samtökum leigjenda á Íslandi: „En mínar orrustur þessa dagana eru á öðrum vettvangi, um daginn fékk heimild fyrrum stjórnar Samtaka leigjenda á Íslandi til að vinna að endurreisn þess félags og það tókst vel. Fram undan eru aðrar orrustur, sem munu byggja upp hreyfingu alþýðunnar, byggja upp fleira forystufólk og á endanum kollvarpa auðvaldinu og þeim sem ganga erinda þess.“
