Greiningardeild ríkislögreglustjóra telur að erlend ríki stundi njósnir hér á landi með svipuðum hætti og í öðrum ríkjum og telst njósnastarfsemin viðvarandi. Þetta kemur fram í svari greiningardeildarinnar við fyrirspurn Morgunblaðsins sem fjallar um málið í dag.

Greiningardeildin gefur reglulega út áhættumat vegna skipulagðrar glæpastarfsemi, hryðjuverka og álags á landamæri landsins en hefur ekki gefið út opinbert hættu- og ógnanamat er snýr að njósnum.

Þegar Morgunblaðið spurði Gylfa Hammer Gylfason, aðstoðaryfirlögregluþjón hjá greiningardeild ríkislögreglustjóra, hvort embættið hafi tök á að sinna þeim málaflokki sem njósnir eru með tilliti til fjölda starfsmanna, sérþekkingar og gildandi lagaheimilda sagði hann aðeins að ljóst sé að lögreglan þurfi að forgangsraða verkefnum sínum og upplýsi ekki um starfsaðferðir sínar á þessu sviði.