Skömmu fyrir klukkan 5 í morgun var tilkynnt um mann liggjandi í garði við hús í Kópavogi. Hann reyndist vera í mjög annarlegu ástandi og illa klæddur. Hann var vistaður í fangageymslu.

Á tólfta tímanum í gærkvöldi var tilkynnt um innbrot í fyrirtæki í vesturborginni. Ekki er vitað hverju var stolið eða hverjir voru að verki.

Á þriðja tímanum í nótt tilkynnti gestur á hóteli í austurborginni um þjófnað á skartgripum úr öryggishólfi í herbergi hans.

Tveir ökumenn voru handteknir í nótt grunaðir um akstur undir áhrifum fíkniefna. Annar þeirra er einnig grunaður um ölvun við akstur. Hinn reyndist vera sviptur ökuréttindum, með röng skráningarnúmer á bifreiðinni og með meint fíkniefni á sér.