Klukkan 00.54 í nótt hófst eftirför á Álftanesvegi þar sem lögreglan reyndi að stöðva akstur ökumanns sem var ekki á þeim buxunum að ræða við lögregluna. Maðurinn ók til Hafnarfjarðar og náði að hverfa sjónum lögreglunnar. En þá kom glöggur vegfarandi lögreglunni til aðstoðar.

Hann lét lögregluna vita að bifreiðinni hefði verið ekið inn í port skammt frá þar sem lögreglumenn misstu sjónar á henni. Bifreiðin var mannlaus er lögreglumenn komu að henni en skammt frá henni var karlmaður á gangi. Hann reyndist vera með lyklana að bifreiðinni í vasanum. Hann var því handtekinn og vistaður í fangageymslu að lokinni blóðsýnatöku en hann er grunaður um ölvun við akstur.