Ari Kristinn Jónsson, rektor Háskólans í Reykjavík, segir í tölvupósti sem var sendur á alla starfsmenn skólans að mál Kristins Sigurjónssonar, lektors við tækni- og verkfræðideild, sé komið í ferli. Líkt og DV greindi frá í gær þá sagði Kristinn innan lokaðs Facebook-hóps að hann vilji síður vinna með konum eða hafa þær nærri sér. Hann kennir nokkra kúrsa við skólann.

Sjá einnig: Lektor við HR segir konur eyðileggja vinnustaði karla: „Konur reyna alltaf að troða sér þar sem karlmenn vinna“

DV hefur undir höndum tölvupóst sem var sendur á alla starfsmenn í gær. Þar segir Ari Kristinn: „Vegna fréttar sem birtist á vef DV í dag um skrif starfsmanns HR á Facebook vil ég taka fram að málið er komið í viðeigandi ferli innan háskólans. Ljóst er að ummælin eru í algjöru ósamræmi við siðareglur HR og stefnu í jafnréttismálum.“

Kristinn lét orðin falla innan Facebook-hópsins Karlmennskuspjallið en hann hefur viðrað svipaðar hugmyndir áður, svo sem í athugasemdum við fréttir. „Það á að aðgreina vinnustaði karla og kvenna. Vandinn er bara að konur reyna alltaf að troða sér þar sem karlmenn vinna, og um leið og þær eru komnar inn, þá byrja þær að eyðileggja hann, því allir kalmennirnir eiga þá að fara að tala, hugsa og hegða sér eins og kerlingar, allt annað er áreiti og ef sagður en neðanbeltisbrandari, svo ég nefni ekki klámbrandari, þá er það kynferðisofbeldi,“ sagði Kristinn á Facebook.