Björn Þorri Viktorsson hæstaréttarlögmaður hefur boðið 500 þúsund krónur í fundarlaun vegna verðmætra muna sem stolið var á dögunum.
Þannig er mál með vexti að sex handfæravindum var stolið úr bátnum Borgar Sig AK-66 þar sem hann lá í Njarðvíkurhöfn um helgina.
„Á sama tíma var einnig stolið samskonar vindum úr Stakkavík GK sem lá fyrir aftan okkur. Allir kaplar voru klipptir upp við vindurnar. Þetta er mikið og tilfinningalegt tjón,“ segir Björn Þorri. Borgar Sig Ak-66 er í eigu Útgerðarfélagsins Upphaf ehf. og er Björn Þorri forráðamaður og stjórnarmaður félagsins.
„Fyrir upplýsingar sem leiða til þess að vindurnar endurheimtist greiðast kr. 500.000,- Endilega deilið og látið berast!,“ segir Björn Þorri í færslu á Facebook-síðu sinni.