Samkvæmt drögum að frumvarpi dómsmálaráðherra um helgidagafrið verður bann við skemmtanahaldi, sýningum, happdrætti og bingói afnumið. Frumvarpsdrögin eru nú í umsagnarferli í samráðsgátt ríkisstjórnarinna. Áfram verður þó óheimilt að trufla guðsþjónustu og annað helgidagahald með hávaða eða annarri háttsemi sem brýtur gegn helgi viðkomandi athafnar.
Fréttablaðið skýrir frá þessu í dag. Helgidagar þjóðkirkjunnar munu áfram vera þeir sömu en upptalning á þeim verður felld úr lögum um helgidagafrið og í staðinn sett í lög um stöðu, stjórn og starfshætti þjóðkirkjunnar. Fréttablaðið hefur eftir Sigríði Á. Andersen, dómsmálaráðherra, að frumvarpið sé í takt við þá þróun sem hefur verið í samfélaginu.