„Ég hugsaði með mér: „Er þetta bara orðið svona það sem eftir er, af því að ég var að fikta í þessu?,“ segir Sigmar Freyr Jónsson, sonur Jóns Páls Sigmarssonar heitins. Sigmar Freyr misnotaði stera árum saman og átti það eftir að hafa miklar afleiðingar á einkalíf hans.
Þetta kemur fram í fréttaskýringaþættinum Kveikur sem sýndur verður á RÚV í kvöld en umfjöllunarefni þáttarins er vaxandi steranotkun á meðal ungra karlmanna hér á landi. Meðal þess sem fram kemur er að ávísanir á steralyf eru helmingi algengari á Íslandi heldur en annars staðar á Norðurlöndum.
Líkt og fyrr segir er Sigmar Freyr sonur eins ástælasta kraftajötuns Íslandsögunnar, Jóns Páls Sigmarssonar. Steralyfjanotkun Jóns Páls var mörgum kunn.
Sölvi Tryggvason skráði sögu hans í bók sem kom út árið 2013 en þar kemur meðal annars fram að Jón Páll leitaði til vina sinna á sínum tíma þar sem hann ræddi steranotkun sína og þær slæmu afleiðingar sem það hafði á heilsu hans. Hann lést af völdum hjartaáfalls árið 1993 en Sigmar Freyr var þá 10 ára gamall.
„Ég hugsaði fyrst í byrjun, þegar þetta var að byrja að virka: „Já, svo það er svona sem það er að vera karlmaður. Það var rosalega skemmtilegt fyrst, fannst mér. Maður var fullur af sjálfstrausti og kynorku,“ segir Sigmar Freyr í viðtali við Kveik.
„Maður var að nota mismunandi tegundir og var ekki alveg búin að fræðast um allar tegundir. Það var kanski eitthvað sem gerði mann alveg getulausan inn á milli og maður skildi ekkert hvað var í gangi.“
„Ég man að ég hætti að nota stera í heilt ár og hafði smá áhyggjur. Ég var ekki orðinn þrítugur og ég fann að kynhvöt og kyngeta kom ekkert til baka á heilu ári.“
Kveikur er sýndur á RÚV klukkan 20.05 í kvöld.
