Fjölmörg dæmi eru um að sníkjudýr greinist í gæludýrum sem flutt eru inn til landsins, jafnvel þó svo að viðkomandi dýr hafi nýlega gengist undir bólusetningar og læknisskoðanir.
Samkvæmt reglugerð MAST skulu allir hundar og kettir sem heimilað hefur verið að flytja til landsins dvelja í einangrunarstöð í 4 vikur. Eftir að innflytjandi hefur fengið innflutningsleyfi skal hann sjálfur panta pláss fyrir dýrið í einangrunarstöð sem viðurkennd er af sjávarútvegs- og landbúnaðarráðuneytinu.
Við heilbrigðisskoðun á síðustu 10 dögum fyrir innflutning má dýrið ekki sýna nein einkenni smitsjúkdóms. Hafi það einkenni eyrnamaurs skal það meðhöndlað gegn honum.
Meðfylgjandi ljósmyndir voru birtar á Facebooksíðu Einangrunarstöðvarinnar í Reykjanesbæ, en þar eru innfluttir hundar og kettir hafðir í sóttkví þar til þau mega hitta eigendur sína.
Fram kemur að starfsfólk fái reglulega fyrirspurnir frá einstaklingum um hvort það séu nokkuð að greinast sníkjudýr þar sem dýrin séu meðhöndluð rétt fyrir innkomu.
„En því miður er það oft þannig að þó dýrin séu meðhöndluð fyrir innkomur þá eru samt að greinast snýkjudýr við innkomu í hverju holli.
Hér er smá sýnishorn úr einu holli, en þessir félagar voru sprellifandi við innkomu, einnig greindust snýkjudýr í fleirri dýrum í sama holli.“