Theódór Helgi Helgason var handtekinn af lögreglunni þann 16.júní síðastliðnum grunaður um akstur undir áhrifum fíkniefna, hann harðneitaði að gefa lögreglunni þvagsýni og vildi þess í stað gefa blóðsýni. Hann gerði það og sleppti því að setjast undir stýri í tvo mánuði á meðan hann beið eftir niðurstöðum rannsóknarinnar. Hann fékk svo bréf frá lögreglustjóranum á Suðurnesjum um að engin efni hefðu mælst í blóðinu og að hann yrði ekki kærður. Í október var Theódór svo aftur stöðvaður af lögreglunni, komst hann þá að því að hann væri próflaus í heilt ár vegna þess að hann neitaði að gefa þvagsýni. Þarf hann að greiða háa sekt. Mbl greindi fyrst frá þessu.
Ég er búinn að lenda í svona þvagprufum áður. Það er ástæða fyrir því að ég steig niður löppinni og sagði „hingað og ekki lengra“. Ég nenni ekki að vera í skjálftakasti í hvert skipti sem ég sé lögregluna koma og stoppa mig. Það að standa fyrir framan lögreglumanninn á meðan hann horfir á kynfærin á þér meðan þú ert að míga er það ógeðslegasta sem ég veit um,“ segir Theódór. Hann segir að hann hafi boðist til þess að gefa munnvatnssýni en lögreglan sagðist ekki eiga réttu tækin til þess.
Í svari við fyrirspurn DV vegna málsins segir Embætti ríkissaksóknara að ef ökumaður neitar að veita aðstoð við rannsókn máls skal hann sviptur ökurétti í að minnsta kosti eitt ár. Vísaði embættið einnig í 47. grein laganna þar sem fram kemur að lögreglan geti fært ökumann til rannsóknar á öndunar-, svita- og munnvatnssýni eða til blóð- og þvagrannsóknar ef ástæða er til að ætla að hann hafi brotið lög um akstur undir áhrifum. Theódór segir að ákvæðunum sé aðeins beitt í embætti Lögreglustjórans á Suðurnesjum, en Embætti ríkissaksóknara segir að lögunum eigi að vera beitt með sama hætti í öllum lögregluumdæmum. Theódór er með hreint sakavottorð en þarf að greiða 125 þúsund króna sekt fyrir að keyra próflaus. „Ég er ekki búinn að fá neitt bréf um það frá lögreglustjóranum eða sýslumanni að ég sé próflaus í ár. Ég bara hélt að þeim myndi ekki detta í hug að gera svona lagað.“
