Einn maður hefur verið handtekinn vegna andláts ungu konunnar á Akureyri. Maðurinn er talinn hafa verið á vettvangi þegar konan lést. Þetta kemur fram í stöðufærslu Lögreglunnar á Norðurlandi eystra. Líkt og DV greindi frá fyrr í dag þá fannst ung kona látin í íbúð á Akureyri í gær.
Bergur Jónsson rannsóknarlögreglumaður sagði í samtali við DV fyrr í dag að málið sé í rannsókn. Konan var búsett í fjölbýlishúsi og samkvæmt heimildum DV eru íbúar í áfalli vegna málsins. Hún var ung og átti tvö börn. Engum er nú hleypt inn í íbúðina og er hún innsigluð af lögreglu.
Sjá einnig: Kona fannst látin á Akureyri
„Lögreglan á Norðurlandi eystra er með til rannsóknar andlát ungrar konu sem fannst látin á heimili sínu, í íbúð í fjölbýlishúsi á Akureyri í gærmorgun, 21. október. Rannsóknin beinist að því að upplýsa um hvenær og hvernig andlátið átti sér stað. Dánarorsök liggur ekki fyrir. Einn maður var handtekinn vegna málsins og var hann í dag úrskurðaður í gæsluvarðhald til föstudagsins 26. október n.k. Sá maður er talinn hafa verið á vettvangi þegar konan lést. Lögreglan á Norðurlandi eystra getur ekki gefið frekari upplýsingar um málavexti meðan fyrstu aðgerðir rannsóknarinnar standa enn yfir,“ segir í tilkynningu.