Samkvæmt niðurstöðum nýrrar viðhorfskönnunar Deloitte á Íslandi hafa 80 prósent fyrirtækja hér á landi orðið fyrir svonefndum veiðipóstaárásum (phising). Í þeim felst að tölvuþrjótar reyna að fá móttakendur tölvupósts til að senda sér viðkvæmar upplýsingar eins og lykilorð starfsmanna eða reyna til að opna hlekki í póstinum. Þessir hlekkir leiða þá fórnarlambið á allt annan stað en fórnarlambið átti von á.

Morgunblaðið skýrir frá þessu í dag. Haft er eftir Þorvaldi Henningssyni, yfirmanni netvarnardeildar Deoloitte á Íslandi, að þessar árásir séu mjög mismunandi að gerð og gæðum. Afleiðingar slíkra árása séu þó oft mjög alvarlegar fyrir þau fyrirtæki sem verða fyrir þeim. Af þessum sökum sé mikilvægt að huga að vörnum gegn þeim. Mestu skipti að starfsfólk sé vel upplýst um hvernig svona tölvupóstar líta úti og að fólk haldi vöku sinni gagnvart því hvort tölvupóstar sem það fær séu frá réttum aðilum eða einhverjum öðrum.