Halla Signý Kristjánsdóttir, þingmaður Framsóknarflokksins, vill að heilbrigðiskerfið leggi áherslu á vefjagigt. Segir hún í grein í Morgunblaðinu í dag að vefjagigtargreining sé talin hluti af 75% örorku hjá stórum hluta kvenna sem voru á örorku en öryrkjum hefur fjölgað hratt á liðnum árum.
Sjá einnig: „Fólk með vefjagigt er bara með bilaðan magnara“
Talið er að vefjagigt hrjái 2-13% fólks á hverjum tíma. Vefjagigt er algengari hjá konum en körlum, eða 3 til 4 konur á móti einum karli. Segir Halla Signý að ekki séu til heildarupplýsingar um fjölda einstaklinga sem greindir hafa verið með vefjagigt hér á landi en í rannsókn frá 1998 reyndist algengi vefjagigtar vera 5,6% meðal 18 ára einstaklinga sem er töluvert algengara en erlendis. Vefjagigt er yfirleitt langvinnur sjúkdómur sem ekki læknast og því fjölgar í hópi vefjagigtarsjúklinga með hækkandi aldri.
Halla Signý hefur nú lagt fram þingsályktunartillögu þess efnis að fela heilbrigðisráðherra að beita sér fyrir fræðslu til almennings um vefjagigt og endurskoða skipan sérhæfðrar endurhæfingarþjónustu með það að markmiði að styrkja greiningarferlið og geta boðið upp á heildræna meðferð byggða á niðurstöðum gagnreyndra rannsókna.
„Heilbrigðiskerfið þarf að leggja eyrun við þessum þögla sjúkdómi og viðurkenna hann sem stóran þátt í að fólk á öllum aldri sé að detta út af vinnumarkaði og einangrast heima með verkjasjúkdóm sem gerir einstaklinginn óvirkan bæði á vinnumarkaði og sem þátttakanda í samfélaginu.“