Karlmaður á fimmtugsaldri, Bogdan Cybulski hlaut á dögunum eins mánaðar skilorðsbundið fangelsi fyrir líkamsárás. Úrskurður féll í Héraðsdómi Reykjaness.
Fram kemur í ákæru að þann 6.október 2016 hafi Bogdan slegið annan karlmann hnefahöggi með hægri hendi í andlitið þar sem þeir voru staddir á ónefndum stað í Reykjanesbæ. Afleiðingarnar voru þær að maðurinn hlaut skurð á efri vör utanvert vinstra megin og vinstri framtönn losnaði.
Bogdan játaði sök fyrir dómi en krafðist þess jafnframt að bótakrafan yrði lækkuð. Fram kemur í dómi að samkvæmt sakavottorði hefur honum ekki áður verið gerð refsing.
Brotaþolinn krafðist þess að fá rúmlega 1,2 milljónir í miskabætur vegna árásarinnar. . Í bótakröfu kemur meðal annars fram að gerð sé krafa um 500.000 króna miskabætur, 50.000 krónur vegna útlagðs kostnaðar og 500.000 krónur vegna áætlaðs tannlæknakostnaðar, auk kostnaðar vegna lögmannsaðstoðar. Samkvæmt kostnaðaráætlun sem lögð var fram á er gert ráð fyrir að brotaþolinn gangist undir skurðaðgerð þar sem tönn verður fjarlægð.
Fram kemur í niðurstöðu dómsins að ekki liggi fyrir gögn um kostnað sem brotaþolinn hefur lagt út. Kröfunni um 50 þúsund króna greiðslu var því vísað frá en Bogdan var dæmdur til að greiða manninum 200 þúsund krónur í miskabætur og auk þess 150 þúsund krínur vegna lögmannsþjónustu.
Við ákvörðun refsingar var meðal annars horft til þess að nær tvö ár voru liðin frá brotinu þegar ákæran var gefin út.