Alls fóru meira en 20.000 vinnustundir í braggaverkefnið á Nauthólsvegi 100. DV hefur reiknað saman vinnustundir sem Reykjavíkurborg greiddi vegna verkefnisins, alls hefur það kostað Reykjavíkurborg meira en 400 milljónir króna en í upphaflegu kostnaðarmati frá 2015 var gert ráð fyrir að verkefnið myndi kosta í mesta lagi 158 milljónir króna. Reikningarnir sem DV hefur undir höndum sýna að verktakar unnu í samtals meira en 20 þúsund klukkustundir við braggann, skálann og fyrirlestarsalinn í Nauthólsvík.
Hér má sjá klukkustundirnar sem einstakir verktakar unnu að braggaverkefninu:
Arkibúllan | 2.102,5 |
Efla | 1.790 |
Landið okkar | 492 |
Þór Gunnarsson | 1.536 |
Rafdís | 58 |
Jóhann Steimann | 925 |
Húsalagnir ehf. | 1.059 |
Smiðurinn þinn | 8.835 |
Ari Oddsson ehf. | 3.282,5 |
Flísar og steinn ehf. | 282 |
Þessir tíu verktakar unnu því í samtals 20.362 klukkustundir.
Klukkustundirnar eru mun fleiri en ekki allir verktakar skiluðu inn reikningum þar sem kemur fram hversu margar klukkustundir fara í verkið. Í tilfelli Garðvéla ehf. þá er ekki tekið fram hversu mikill tími fór í verkið en miðað við að Reykjavíkurborg greiddi fyrirtækinu 19.524.786 krónur þá má leiða að því líkum að það hafi verið umtalsverður tími.
Sama á við í tilfelli Rafrúnar, sem er langstærsti einstaki verktakinn sem lagði rafmagn í byggingarnar. Alls greiddi Reykjavíkurborg Rafrúnu 35.149.283 krónur fyrir raflagnavinnu.
Ari Oddsson ehf. er byggingaverktaki, samkvæmt heimasíðu fyrirtækisins er um að ræða verktaka með mikla reynslu í viðhaldi á fasteignum hvað varðar tré og múrverk, lekavandamálum og sérhæfðum flóknum verkefnum. Samkvæmt reikningunum vann verktakinn í alls 3.282,5 klukkutíma. Borgin greiddi verktakanum meira en 35 milljónir króna.
Reykjavíkurborg greiddi Jóhanni V. Steimann rúmar 8,6 milljónir fyrir málningarvinnu á Nauthólsvegi 100 frá október 2017 til júní 2018.
Í tilviki Garðvéla ehf. er ekki tekið fram hversu margir tímar fóru í verkið.
Sama á við um Rafrúnu ehf.
Húsalagnir ehf. unnu í 1.059 klukkutíma við verkið.
Arkitektastofan Arkibúllan ehf. vann í rúmlega 1.300 klukkutíma við hönnun og meira en 600 klukkutíma við eftirlit og umsjón.
Reykjavíkurborg greiddi vrkfræðistofunni Eflu fyrir 1.790 klukkustundir af vinnu. Þar af fóru 170 klukkutímar í að hanna lýsingu.
Hæstu greiðslunar fóru til Smiðurinn þinn slf., alls um 105 milljónir fyrir 8.835 klukkutíma vinnu, efniskaup og fleira.